ძიება
დამატება

სარა ებოტი: ბრიტანეთში ქართულ ღვინოზე ინტერესი მზარდია

ღვინის ბრიტანელი მაგისტრი, ღვინის ეროვნული სააგენტოს კონტრაქტორი კომპანია Swirl Wine Group-ის ხელმძღვანელი სარა ებოტი ღვინის პროფესიონალების ჯგუფთან ერთად  საქართველოს სტუმრობს.

ტურის ფარგლებში ღვინის პროფესიონალები – სომელიეები, რესტორატორები, იმპორტიორები და მედიის წარმომადგენლები ესტუმრნენ ღვინის კომპანიებსა და მცირე მარნებს, სადაც დააგემოვნეს სხვადასხვა სტილის ღვინო და გაეცნენ ქართული ღვინის დაყენების ტექნოლოგიას.

სარა ებოტის ინფორმაციით, ბრიტანეთში ქართულ ღვინოზე ინტერესი მზარდია.

“ჩვენს სტუმრებს სურთ გაიცნონ ქართული ღვინის მრავალფეროვნება. ჩვენ მოვინახულეთ შედარებით მცირე მეწარმეები, რომლებიც ქვევრის ღვინოს ამზადებენ, ასევე ვხვდებით შედარებით მსხვილ მეწარმეებს, სადაც უფრო მეტი სახეობის ღვინო მზადდება. შევხვდით მეღვინეებს და ღვინის ქარხნების მფლობელებს, რომლებმაც უამრავი ინფორმაცია გაგვიზიარეს და დაგვაგემოვნებინეს არაჩვეულებრივი ღვინოები. მივიღეთ ქართული სტუმართმოყვარეობის გამოცდილება, რომელიც გულგრილს ვერავის დატოვებს” – აღნიშნა სარა ებოტმა.

კომპანიის „კახური ღვინის მარანი“ მთავარი მეღვინის, თემურ გონჯიშვილის თქმით,  სტუმრებზე, სხვა ღვინოებთან ერთად, განსაკუთრებული შთაბეჭდილება ქვევრის ღვინოებმა მოახდინა.

„სტუმრებმა დიდი ინტერესი გამოხატეს ქართული ღვინის მიმართ – სვამდნენ სპეციფიკურ შეკითხვებს, ქართული ღვინის შესახებ ყველაფერი აინტერსებდათ. მათში დიდი მოწონება დაიმსახურა ქვევრის ღვინოებმა. ჩვენი სურვილია, რომ ყოველთვის, როდესაც ქართულ ღვინოზე ვისაუბრებთ, ის ყოველთვის ასოცირდებოდეს ხარისხთან. ჩვენი საქმიანობის მიმართულებაც სწორედ ხარისხის უზურნვეყოფაა, რაც დღევანდელმა დღემაც დაადასტურა“ – აღნიშნა თემურ გონჯილაშვილმა.

ტურის დასასრულს ბრიტანელი სტუმრები სოფლის მეურნეობის სამეცნიერო-კვლევითი ცენტრის ჯიღაურას სანერგე მეურნეობას  ეწვივნენ, სადაც გაეცნენ ქართული ვაზის ადგილობრივი ჯიშების მრავალფეროვნებას და დააგემოვნეს იშვიათი ქართული ვაზის ჯიშებისგან დამზადებული ღვინოები.

ღვინის ეროვნული სააგენტო სარა ებოტის მარკეტინგულ კომპანიასთან ,,სვირლ ვაინ გრუფ“ („Swirl Wine Group“) 2017 წლიდან თანამშრომლობს. ქართული ღვინის პოპულარიზაციისა და საექსპორტო პოტენციალის გაზრდის მიზნით, ბრიტანელი პროფესიონალების წინაშე ქართული ღვინის წარდგენა ძალიან მნიშვნელოვანია, რადგან ბრიტანეთი მსოფლიოში ერთ-ერთი ყველაზე დიდი იმპორტიორი და  ღვინის მომხმარებელი ქვეყანაა.

მიმდინარე წლის 5 თვის მონაცემებით, საქართველოდან დიდ ბრიტანეთში ექსპორტირებულია 45,2 ათასამდე ბოთლი ღვინო, რაც 109%-ით აღემატება გასული წლის ანალოგიური პერიოდის მეჩვენებელს.

www.travelingeorgia.ge

კომპანიის სიახლეები:

Add Comment

Your email is safe with us.

Reset Your Password